تجربتي مع مبرد Majesty Panorama

يشبه مبردات البانوراما من Tryx شاشة منحنية 2k نوعها AMOLED بنفس الرزولشن والابعاد فرق طفيف اعتقد سببه شعار Majesty في زاوية الشاشة لكن جميلة جدا

التجربة كانت على معالج الـ 9800x3d مع تدبيل مراوح المبرد وكانت الحرارة توصل ٩١ تحت الضغط لمدة ١٠د وهذا في اختبار R23 اللي ما يعتبر ثقيل فغالبا راح توصل ٩٥ تحت الضغط الثقيل المستمر

الأداء متوسط واشوفه مناسب للمعالجات اللي ما تستهلك اكثر من ١٠٠واط زي الـ 7800x3d وال 9700x وال 9600x بدون تفعيل ال 105W TDP

سويت PBO للمعالج والحرارة بعد الكيرف ٨٠ لمدة ٣٠د مع سكور اعلى

ما ركزت عليها بالتجربة وكانت بالخلف وفيصل كان مستعجل على جهازة ولا كان ركبتها قدام وجلدتها شوي بمعنى ما عندي تفاصيل للاسف

اول مبرد من ماجيسيتي اجربه لكن كجودة مقبولة مع اني واجهة مشكلة بسيطة في براكت الـ AM5 احد المسامير طاح اثناء التركيب واضطريت ارجع افكه واصلحه واركبه من جديد اعتقد يبيله تحسين في هالجانب ( هذي مشكلة اللي يركب اما صاحب الجهاز ما له شغل عشان كذا ما لها اعتبار كتقييم كامل )

بالبداية اتمنى من ماجيستي يحطون طريقة واضحة لتحميل السوفتوير لان صورة QR Code على الكتيب بيتصور بالجوال واكيد ما راح احمل التطبيق في جوالي ليتهم يوفرون السوفتوير في صفحة المنتج في متجرهم عشان يسهل على الواحد يدخل ويحمله

نرجع للتطبيق ما اخذت وقتي في التجربة لكن بعطي انطباعي عن الواجهة اشوفها تحتاج تسهيل شوي وترتيب مع ثيمات جاهزة تستاهل حتى لو كانت اقل من الموجودة حاليا

قبل اقول رايي بالمبرد ترا ما وصلني من ماجيستي فيصل بنفسه طالبة وقلت اشارك التجربة فقط

جميل اذا اهتمامك الاول هو الشكل + معالجك متوسط اعتقد سعره منطقي بما انه يستخدم شاشة AMOLED لكن ما نقول لا لو توفر منه نسخة بتبريد افضل للمعالجات العالية مع بعض التحسينات وياليت نشوف مضخة Asetek Gen10 Emma

تجميعة فيصل الله يبارك له

شايفين الشاشة اللي فوق هذي شاشة مبرد الـ Thermalright Trofeo Vision

كانت الخطة على مبرد ثرمل لكن وصل والماء ناقص في الرديتر واضطرينا نرجعه وامازون كثر الله خيرهم ما قصروا قالوا خل المبرد وخذ فلوسك وعلى وقتها نزل مبرد ماجيستي الجديد واعجب فيصل وطلبة كبديل وقلنا نستفيد من الشاشة دام المبرد متعطل